Analisti Shenoll Muharremi ka thënë se paralajmërimet për rritje të çmimit të energjisë elektrike janë të frikshme.

Ai në Facebook ka thënë se nëse një gjë e tillë ndodh atëherë për familjet kosovare është e papërballueshme.

Postimi i plotë:

Këto kërkesat që po i shohim për rritje të mëtutjeshme të faturave të rrymës janë të frikshme. Thuhet që në Kosovë “rryma është më e lira në rajon”, por nuk është e vërtetë nëse krahasohet me fuqinë blerëse dhe të ardhurat.

Kam shikuar çka do të thotë nëse rritet ende çmimi i rrymës, dhe ajo çka shoh është e papërballueshme për familjet kosovare. Nëse aplikohet rritje 35% nga tarifat aktuale, atëherë rritja prej vitit 2021 e çmimit të rrymës do të rritet në 183% për njërën tarifë A1B1, ndërsa 166% për tarifën tjetër A1B2.

Nuk besoj që kalon pa pakënaqësi dhe protesta sociale. Jo që besoj në kapacitetet ‘protestuese’ të shoqërisë sonë, por literalisht nuk munden me i përballu më koston e jetës edhe ashtu shumë të rënduar dhe do të detyrohen të protestojnë goxha ashpër dhe të luftojnë për mirëqenien e tyre, e cila po rrënohet vitet e fundit.