Portieri i Milanit, Mike Maignan, kryeson renditjen e portierëve më vendimtarë në kampionatin italian sipas të dhënave të fundit nga “Opta”.

Gjatë 20 javëve të para të sezonit, francezi ka pësuar vetëm 16 gola, ndërkohë që bazuar në cilësinë e gjuajtjeve të pritura, statistikat parashikonin mesatarisht 23.7 gola.

Kjo diferencë tregon se Maignan ka shmangur 7.7 gola të sigurt, duke u renditur i pari në ligë për këtë tregues efikasiteti. Për të nxjerrë statistikat, është matur probabiliteti i shënimit të një goli duke analizuar pozicionin, fuqinë dhe këndin e gjuajtjeve që shkojnë në drejtim të portës.

Paraqitjet e tij kanë qenë një faktor kyç në rezultatet e kuqezinjve, duke konfirmuar formën e tij të lartë në këtë fazë të kampionatit.

Aktualisht, klubi dhe lojtari janë gjithashtu në bisedime për rinovimin e kontratës, nxitur edhe nga këto performanca pozitive.