Kancelarja Angela Merkel tha se duke gjykuar nga përvoja e vendeve të tjera evropiane nuk kishte asnjë alternativë ndaj ligjit “të ashpër” të coronavirusit që hyri në fuqi në të gjithë Gjermaninë të shtunën.
Sipas medieve të huaja, përcjell Telegrafi, Ligji i njohur si “frenimi emergjent” imponon kufizime uniforme të coronavirusit, siç është një shtetrrethim gjatë natës, në zonat ku infeksionet përhapen me shpejtësi.
Kjo fillon kur shkalla e infeksionit në një rreth të caktuar, e matur nga numri i rasteve gjatë javës së kaluar për 100,000 njerëz, arrin më shumë se 100 për tre ditë rresht.
Dhe në këtë aspekt, një pjesë e gjerë e Gjermanisë tejkalon kufirin, nga komunitetet rurale në qytete të mëdha si Berlini, Këlni, Frankfurti dhe Mynihu.
“Asnjë vend që ka arritur të ‘thyejë’ valën e tretë të pandemisë dhe pastaj të relaksohet nuk e ka bërë këtë pa masa të ashpra siç janë kufizimet shoqërore gjatë natës”, citohet të ketë thënë Merkel në mesazhin e saj të përjavshëm me video.
Kjo është arsyeja pse Gjermania “nuk mund të shmangë masat”, tha ajo.
Ligji, i miratuar këtë javë nga parlamenti, ka provokuar debat pasi lejon qeverinë federale të zëvendësojë vendimet e nivelit shtetëror, një ndryshim kryesor në marrëdhëniet midis qeverive federale dhe shtetërore.
Merkel argumentoi se Gjermania duhej t’i jepte fund “përgjigjes së saj me lara-lara” ndaj pandemisë dhe tha se lëvizja ishte veçanërisht e nevojshme tani ndërsa vendi përpiqet të zbusë një valë të tretë.
Masat përfshijnë mbylljen e hapësirave kulturore, një shtrëngim të lehtë të kufizimeve të kontaktit dhe një shtetrrethim nga ora 10 në mbrëmje në 5 të mëngjesit, elementi më i diskutueshëm.
Shkollat gjithashtu duhet të kalojnë në mësimin në distancë nëse shkalla e incidencës tejkalon 165, rregullat e reja të higjienës të zbatohen për bizneset jo-thelbësore dhe restorantet të jenë të mbyllura përveç ofertave të “marrjes me vete”.
Ndryshe, deri më tani, rreth 7 për qind e njerëzve në Gjermani janë vaksinuar plotësisht. Përqindja e njerëzve që morën dozën e parë të një vaksine qëndroi në 22 për qind deri të shtunën, sipas Institutit të Robert Koch.
LEXO EDHE:
