FIFA tregoi me krenari se biletat e shitura për Kupën e Botës 2026 në Shtetet e Bashkuara, Meksikë dhe Kanada kanë tejkaluar 1 milionin.

Tifozë nga 212 vende kanë mundur të blejnë bileta në fazën e para-shitjes, e cila u hap në mesin e shtatorit, transmeton GazetaBlic Sport.

Tre vendet pritëse – Shtetet e Bashkuara, Kanadaja dhe Meksika – kanë aplikuar më shumë deri më tani, të ndjekura nga Anglia, Gjermania, Brazili, Spanja, Kolumbia, Argjentina dhe Franca.

“Jemi të emocionuar që jemi në rrugën drejt vitit 2026. Sot festojmë tejkalimin e shifrës së një milion biletave në para-shitje – provë fantastike se Kupa e Botës më ambicioze po gjeneron shumë entuziazëm”, tha Presidenti i FIFA-s, Gianni Infantino.

28 ekipe janë kualifikuar tashmë për Kupën e Botës, e cila do të përfshijë 48 vende për herë të parë, që do të thotë se mund të presim 104 ndeshje verën e ardhshme, të luajtura në 16 qytete.

Shitja e parë publike e biletave do të hapet më 27 tetor, duke ofruar bileta për ndeshje individuale, tha FIFA. Një platformë zyrtare shitjesh është lançuar gjithashtu për të mbrojtur tifozët nga mashtrimet e mundshme.

/GazetaBlic Sport/