Mavijosje të reja në dorën e majtë të Donald Trump po rikthejnë pyetjet për gjendjen e tij shëndetësore, pothuajse një vit pasi ai u bë presidenti më i moshuar që ka bërë betimin e detyrës.
Gjatë një sërë aktivitetesh javën e kaluar, Trumpi 79-vjeçar u shfaq me njolla të errëta ose mavijosje të lehta në pjesën e pasme të dorës së majtë, përveç mavijosjes më të vazhdueshme në dorën e djathtë, e cila është vënë re prej muajsh.
Mavijosja e re duket se e ndërlikon shpjegimin e Shtëpisë së Bardhë, sipas të cilit Trumpi, që është djathtak, i ka zhvilluar mavijosjet nga shtrëngimet e shpeshta të duarve, së bashku me përdorimin e rregullt të aspirinës, e cila mund t’i bëjë këto njolla më të zakonshme, raporton CNN.
Dhe ndonëse ekspertë mjekësorë i thanë mediumit se nuk ka arsye të reja për shqetësim, duke e cilësuar si një gjendje të padëmshme dhe të zakonshme te njerëzit e moshuar, ata paralajmëruan se ngurrimi i Trumpit për të qenë më transparent për shëndetin e tij vetëm sa rrezikon të shtojë vëmendjen kritike nga e cila ai ka tentuar të shpëtojë gjatë gjithë vitit.
“Thjesht po ushqejnë ciklin e kureshtjes,” tha Dr. Jeffrey Linder, shef i mjekësisë së përgjithshme interne në Shkollën e Mjekësisë Feinberg të Universitetit Northwestern. “Ai është në sytë e publikut, ka një imazh që dëshiron të paraqesë, dhe edhe këto gjëra të vogla ia zbehin atë imazh.”
Mavijosja e re në dorën e majtë të Trumpit përfaqëson zhvillimin më të fundit që nxit spekulime për shëndetin e tij që nga rikthimi në Shtëpinë e Bardhë — një temë e ndjeshme për të, të cilën ai ka kërkuar ta kundërshtojë duke u mburrur shpesh me energjinë dhe gjallërinë e tij.
Trumpi fitoi vitin e kaluar, pjesërisht duke nxitur shqetësimet e votuesve për moshën dhe aftësinë mendore e fizike të ish-presidentit Joe Biden. Trump ka vazhduar ta përdorë Bidenin, 83 vjeç, si kundërfigurë retorike dhe ka refuzuar çdo krahasim me ish-presidentin, pavarësisht afërsisë në moshë, duke nënvlerësuar shpesh dobësinë e paraardhësit të tij dhe duke e theksuar praninë e tij publike me pyetjen: “A mendoni se Biden do të mund ta bënte këtë?”
Megjithatë, edhe pse Trump ka mbajtur një axhendë publike shumë më aktive, ai ka qenë herë pas here i ndjekur nga pyetje për shëndetin e tij. Pasi fotografi gjatë verës treguan ënjtje në këmbët e tij, Shtëpia e Bardhë njoftoi në korrik se Trump ishte diagnostikuar me insuficiencë venoze kronike — një gjendje e zakonshme që shpesh gjendet te njerëzit e moshuar.
I pyetur këtë javë për mavijosjen në dorën e majtë të Trumpit, Shtëpia e Bardhë refuzoi të japë ndonjë shpjegim të ri.
“Presidenti Trump është një njeri i popullit dhe takon më shumë amerikanë dhe shtrëngon më shumë duar çdo ditë se çdo president tjetër në histori,” tha zëdhënësja për shtyp Karoline Leavitt.
Disa ekspertë mjekësorë që shqyrtuan fotot e dorës së majtë të Trumpit i thanë mediumit se njollat nuk ka gjasa të jenë rezultat i shtrëngimit të duarve — duke qenë se Trump është djathtak — por se mosha e tij dhe përdorimi i aspirinës mund të ofrojnë një shpjegim të ngjashëm.
“Mavijosja mund të jetë thjesht një rast i veçantë, kur pëson ndonjë traumë të vogël, përplasesh me diçka,” tha Dr. Jonathan Reiner, profesor në Shkollën e Mjekësisë dhe Shkencave Shëndetësore të Universitetit George Washington dhe ish-kardiolog afatgjatë i ish-zëvendëspresidentit Dick Cheney. “Aspirina të bën më të prirur ndaj gjakderdhjes.”
Reiner, i cili theksoi se nuk e ka ekzaminuar personalisht Trumpin, shtoi se shpesh sheh mavijosje të ngjashme te pacientët që marrin ilaçe më të forta holluese të gjakut se aspirina, duke ngritur pyetje nëse Trump ka deklaruar të gjitha medikamentet që përdor.
Sipas tij, ilaçe të tilla janë të zakonshme dhe nuk tregojnë domosdoshmërisht ndonjë problem më serioz shëndetësor, duke përmendur deklarimin nga Biden të përdorimit të holluesit të gjakut Eliquis gjatë kohës në detyrë.
“Tani pyetja është më pak mjekësore dhe më shumë për transparencën,” tha Reiner.
Shtëpia e Bardhë nuk iu përgjigj pyetjeve lidhur me medikamentet e Trumpit dhe nëse ai i ka deklaruar të gjitha, duke kritikuar në vend të kësaj vëmendjen ndaj shëndetit të tij.
“Çdo i ashtuquajtur profesionist mjekësor që angazhohet në diagnoza nga kolltuku ose spekulime të rreme për qëllime politike po shkel qartazi Betimin e Hipokratit që ka dhënë dhe duhet të kontrollojë mendjen,” tha drejtori i komunikimit Steven Cheung në një deklaratë.
Nga mavijosjet te dremitjet, një vit nën vëzhgim të shtuar
Trump ka pasur prej kohësh mavijosje në dorën e djathtë, për të cilën mediumi ka raportuar se ekzistonte edhe para rikthimit të tij në Shtëpinë e Bardhë. Por ajo tërhoqi më shumë vëmendje pasi ai filloi ta mbulonte me grim të rëndë dhe fashë, si dhe ta fshihte nga kamerat me dorën tjetër — veprime që vetëm sa shtuan dyshimet.
Shtëpia e Bardhë e adresoi mavijosjen në dorën e djathtë në të njëjtën kohë me njoftimin e diagnozës për insuficiencë venoze kronike. Një letër nga mjeku i tij, e publikuar në atë kohë, thoshte: “Presidenti Trump mbetet në shëndet të shkëlqyer.”
Në tetor, Trump u kthye në Walter Reed pas kontrollit të tij mjekësor të prillit për një vizitë të dytë të papritur, të cilën Shtëpia e Bardhë e quajti “rutinë”, përpara se presidenti të zbulonte më vonë se kishte bërë një rezonancë magnetike (MRI). Zbulimi i paqartë — Trump fillimisht tha se ishte “perfekt”, por u tha gjithashtu gazetarëve se nuk e dinte se cila pjesë e trupit ishte imazhuar — dhe ngurrimi i administratës për të dhënë më shumë detaje, nxitën shqetësime për arsyen pse mjekët kishin urdhëruar skanimin.
Disa javë më vonë, mjeku i Trumpit, Dr. Sean Barbabella, tha në një memorandum se imazheria mjekësore kishte përfshirë sistemin kardiovaskular dhe atë abdominal dhe se të dyja kishin treguar rezultate “krejtësisht normale”. Ai shtoi se “imazheria e avancuar u krye sepse burrat në këtë grupmoshë përfitojnë nga një vlerësim i detajuar i shëndetit kardiovaskular dhe abdominal”.
Reiner i tha CNN-it në atë kohë se një kontroll i tillë mjekësor nuk është procedurë standarde. “Kjo, padyshim, u krye si përgjigje ndaj një shqetësimi klinik,” tha ai. Arsyeja e skanimit “ndoshta nuk është aq dashakeqe”, shtoi ai, por sugjeroi se do të ishte më mirë që administrata të ishte më e hapur për të shmangur spekulimet.
Brenda Shtëpisë së Bardhë, zyrtarët janë irrituar nga kërkesat për më shumë transparencë, duke i parë këto pyetje kryesisht si të motivuara politikisht dhe me synimin për të mbjellë dyshime mbi vitalitetin e Trumpit.
Pasi presidenti u duk se për pak çaste dremiti gjatë një aktiviteti në Zyrën Ovale muajin e kaluar, Shtëpia e Bardhë mohoi se ai kishte fjetur dhe e quajti këtë “një narrativë të pavlerë”. Një raport i New York Times disa ditë më vonë, që shqyrtonte shëndetin dhe axhendën e përditshme të Trumpit, shkaktoi zemërimin personal të presidentit, i cili e quajti atë “një sulm” në një postim në rrjetet sociale. Por gjatë një mbledhjeje të kabinetit më herët këtë muaj, Trump sërish kaloi rreth një orë duke u dukur sikur po dremiste. (Shtëpia e Bardhë reagoi, duke thënë se Trump kishte qenë “duke dëgjuar me vëmendje dhe duke drejtuar të gjithë maratonën treorëshe të mbledhjes së kabinetit”.)
Tani, fotografitë e dorës së majtë të Trumpit — që tashmë kanë qarkulluar për ditë të tëra në rrjetet sociale — po i shtohen asaj që votuesit shohin teksa ndjekin një president në mandatin e dytë, në prag të hyrjes në dekadën e tetë të jetës.
Timothy Naftali, historian presidencial dhe studiues në Universitetin Columbia, paralajmëroi se, ndonëse të gjitha administratat përballen me presion për transparencë rreth shëndetit të presidentit, këmbëngulja e Trumpit për të projektuar një imazh të vitalitetit të palëkundur bën që edhe shenjat më të vogla të cenueshmërisë të tërheqin vëmendje intensive.
“Presidenti nuk është i ri,” tha ai. “Dhe kur gjërat mbivlerësohen dhe më pas perceptohet një mangësi, rëndësia e saj shumëfishohet.”
