Organizatorët e gjysmëmaratonës së së dielës në Varshavë e quajtën garën e këtij viti “Gjysmë-Maratona e Paqes në Varshavë” dhe ia kushtuan ngjarjen atyre që u detyruan të largoheshin nga Ukraina.

Pjesëmarrësja Valentyna Dushko, e cila i përket Klubit të Vrapimit të njohur të Ukrainës MK, falënderoi organizatorët dhe Poloninë në përgjithësi që siç tha “na kanë ndihmuar të kalojmë këtë periudhë të vështirë të jetës”.

Mbi 7 mijë njerëz morën pjesë, sipas organizatorëve, me disa që vrapuan për të mbledhur para për fëmijët refugjatë ukrainas, raporton AP.
Organizatorët dhuruan gjithashtu një pjesë të të ardhurave për të mbështetur aksionin humanitar polak, si dhe mbledhjen e fondeve për tre spitale, duke përfshirë një spital për fëmijë, në Ukrainën perëndimore.

Emanuel Giniki Gisamoda nga Tanzania fitoi garën e meshkujve dhe vendosi një rekord të ngjarjes prej 01:00:30, ndërsa Tiruye Mesfin Aman e Etiopisë vrapoi kohën më të shpejtë për femra në këtë ngjarje prej 1:08:55.