Udhëheqësja e opozitës venezueliane, Maria Corina Machado një ditë pas takimit me presidentin Donald Trump këmbënguli se vendi i saj ishte në një rrugë të pakthyeshme drejt demokracisë

Duke folur në Fondacionin Heritage, Machado tha se është e bindur se Venezuela do të shohë një tranzicion dhe se do të zhvillohen zgjedhje të lira dhe të ndershme.

Ajo më tej beson se Trump do të bëjë atë që është e nevojshme për ta bërë realitet një Venezuelë të lirë.

“Venezuela do të jetë e lirë”, tha Machado, duke shtuar se liria do të arrihet me mbështetjen e popullit të Shteteve të Bashkuara dhe Presidentit Donald Trump.

Ajo e përshkroi momentin si hapat e parë të një tranzicioni të vërtetë drejt demokracisë, ndërsa pranoi se procesi do të jetë i vështirë.

“Një Venezuelë demokratike do të bëhej një nga aleatët më të ngushtë të Shteteve të Bashkuara në hemisferë dhe një shoqëri thellësisht pro-amerikane” tha ajo.

“Nuk kam asnjë dyshim se Presidenti Trump, administrata e tij dhe populli i Shteteve të Bashkuara mbështesin demokracinë, drejtësinë dhe lirinë.

Ky është një proces i vështirë. Por rezultati do të jetë një Venezuelë krenare, e lirë, demokratike dhe e gatshme për të ecur përpara”, theksoi ajo.