Trajneri i Paris Saint-Germain, Luis Enrique, tha se ishte i kënaqur me fitoren 3-0 kundër Milanit në ndeshjen e tyre në Ligën e Kampionëve në Grupin F.

Megjithatë, ai ka bërë edhe disa vërejtje për lojtarët e tij. Sipas tij, ata nuk ishin në nivel në minutat hapëse dhe rezultati mund të ishte ndryshe. Luis Enrique është i bindur se kampionët francezë janë në grupin e vdekjes dhe do të duhet të luftojnë deri në fund për të kaluar në fazën eliminatore të turneut më të madh të klubeve në Evropë.

“20-25 minutat e para ishin për Milanin. Bëmë shumë gabime me topin. Na tronditi besimin. Goli i Kylian na qetësoi. Pas pjesës së parë ishim ndryshe, me më shumë saktësi. Ishim më mirë. Për mua gjëja më e rëndësishme është fitorja. Është e rëndësishme që tifozët të dinë se lojtarët dhanë gjithçka. Duhet të shkojmë në Milano dhe ta fitojmë ndeshjen tani”, tha specialisti spanjoll.

“20 minutat e para nuk ishin të mira. Ky është rezultati më i mirë, por nuk pasqyron atë që ndodhi në 20 minutat e para. Ne ishim të mirë në mbrojtje në atë kohë. Nëse ata do të kishin shënuar para nesh, besimi ynë do të ishte më i ulët dhe rezultati mund të ishte krejtësisht ndryshe. Ende nuk e kam kapërcyer humbjen e Newcastle (1-4), mirë… nuk do ta harroj. Ky është grupi i vdekjes, do të duhet të luftojmë deri në ndeshjen e fundit. Do të jetë e vështirë për ne të luajmë në Milano kundër Milanit, i cili është në një situatë më të komplikuar se ne”, shtoi ai.

/GazetaBlic Sport