Gjatë ditës së sotme, La Liga ka njoftuar se do të paraqesë një padi kundër revizorit të llogarive të Barcelonës për datën 31 dhjetor, pasi nuk do të ishte e mundur të përfshiheshin 100 milionët që vijnë nga shitja e vendeve VIP të ‘Spotify Camp Nou të ri’, një impiant që ende është në ndërtim, në bilancin tregtar të vitit 2024.

Një padi që do ta vendoste sërish klubin ‘blaugrana’ në vështirësi sa u përket transferimeve të Dani Olmo dhe Pau Victor.

Pikërisht për këtë çështje ka folur presidenti Joan Laporta për mediet e pranishme pas drekës së Këshillit të Administratës, përpara ndeshjes së Barcelonës kundër Atlético Madridit, e cila do të luhet sonte në ‘Metropolitano’ për një vend në finalen e Kupës së Mbretit:

“Kam ndjesinë që kjo nuk është rastësi: sot luajmë një ‘finale’ kundër Atlético Madridit dhe rihapja e polemikave të këtij lloji nuk është e rastësishme.

Është një tjetër përpjekje për të destabilizuar ekipin tonë dhe ndonjëherë kam ndjesinë se ngaqë nuk mund të na mundin në fushë, duan të na mundin në zyra.

Si president i Barçës, nuk do ta lejoj dhe do të vazhdoj të mbroj interesat e klubit tonë.

Do t’i përgjigjemi La Ligës. Ata duan të sulmojnë interesat tona. Ata miratuan afrimet e Pau Victor dhe Olmo dhe tani kanë ndryshuar mendje.

Pse? A kanë bërë një punë të dobët që nga fillimi kur i miratuan këto operacione?”