Sipas La Gazzetta dello Sport, Zlatan Ibrahimovic mund të mos kthehet në kohë për ndeshjen e Milanit në Ligën e Kampionëve kundër Tottenhamit në shkurt, pasi ai ende ndjen dhimbje në gju.
41-vjeçari po stërvitet në Milanello dhe nuk do të udhëtojë me skuadrën në Riyad ku kuqezinjtë do të përballen me Interin në Superkupë të mërkurën. Të drejtuarit e Stefano Piolit do të largohen pas ndeshjes së sotme kundër Lecces, por Ibra nuk do të jetë me ta, megjithëse mund t’u bashkohet shokëve të tij në fund të javës së ardhshme, përcjell GazetaBlic Sport.
Suedezi është ende duke u rikuperuar pasi iu nënshtrua një operacioni në gju në maj. Ai pritej të kthehej për ndeshjen e shkurtit të Ligës së Kampionëve kundër Tottenhamit në San Siro, por përditësimet e fundit nga Milanello janë mjaft shqetësuese.
Sipas raportit të fundit të Gazzetta, Ibra ende ndjen dhimbje në gju, kështu që rikthimi i tij në aksion ka gjasa të vonohet më tej.
Ish-sulmuesi i Interit dhe Juventusit e filloi ndeshjen e tij të fundit në Serie A një vit më parë, më 17 janar 2022 dhe kontrata e tij me ‘Rossonerët’ skadon në qershor. Siç qëndrojnë gjërat, është e vështirë të imagjinohet që kuqezinjtë të vazhdojnë me 41-vjeçarin edhe për një sezon në qershor.
/GazetaBlic Sport/
