Përfaqësuesi i Bashkimit Evropian për dialogun Kosovë-Serbi, Miroslav Lajçak, do të qëndrojë për vizitë dyditore në Kosovë.
Ai do të takohet me kryeministrin Albin Kurti dhe zëvendësin e tij, Besnik Bislimi dhe me krerët e partive opozitare në vend.
Lajçak do të diskutoje për draft-statutin e Asociacionit dhe çështje të tjera.
Lidhur me pritjet nga vizita e tij, për Gazeta Blic ka folur deputeti i Lëvizjes Vetëvendosje, Gramos Agusholli.
Ai thotë se diskutimet për Asociacionin janë mbyllur nga pala jonë dhe se Kurti e ka bërë të ditur pozicionin e Kosovës si shtet.
“Diskutimet për draft statutin e Asociacionit besoj që veçse janë punë e kryer nga pala jonë. Kryeministri Kurti e ka bërë të qartë pozicionin tonë si shtet, jo si individ siç u cek atë ditë në seancë nga opozita”, shprehet deputeti i VV-së për gazeta Blic.
Ai shton se tani ‘topi’ është te Lista Serbe, që do t’u kërkohet kthimi në institucione.
“Tash ‘topin’ e kanë përfaqësuesit e Listës Serbe, të cilëve do t’ju kërkohet të kthehen në institucione me sa kam informacion. Po sa kanë kredibilitet moral ta pranojnë këtë gjë, mbetet të shihet”, deklaron Gramos Agusholli./Gazeta Blic/
