Mimoza Kusari Lila, shefja e grupit parlamentar të Lëvizjes Vetëvendosje e ka ‘korrigjuar’ raportin e Departamentit amerikan të Shtetit, duke thënë se ai përmban pasaktësi.

Në diskutimin parlamentar për këtë raport dhe atë të Freedom House, Kusari Lila tha se edhe për çështjen e lirisë së mediave dhe sulmeve ndaj gazetarëve, DASH-i “fatkeqësisht” ka gabuar.

“Te liria e mediave për vitin 2023, fatkeqësisht DASH-i nuk e bën ndarjen cilësore të akterëve, për të cilët AGK-ja pretendon se i kanë sulmuar gazetarët. Raportimet jepen si numër i përgjithshëm, brenda të cilit janë raste kur akterët janë grupe të komuniteteve, grupet fetare, grupet afariste të interesit, stafi gjyqësor dhe zyrtarë qeveritarë. Sulmet fizike dhe dëmtimi i pronës ndaj gazetarëve për vitin 2023, lidhet në masë të madhe me ngjarjet në veri të vendit, ndërsa keqbërësit dihen”, tha Kusari Lila.

“AGK regjistroi 30 sulme kundër gazetarëve që mbulonin tensionet politike në veri në maj dhe qershor, përfshirë dëmtimet e pajisjeve, djegien e automjeteve dhe sulmin fizik ndaj ekipeve të mediave”, shtoi ajo.

Raporti i DASH-it përmendi kufizime serioze në lirinë e shprehjes dhe të mediave, përfshirë kërcënime apo dhunë kundër gazetarëve. Në këtë raport thuhet se gjatë vitit të kaluar në Kosovë ka pasur raportime të shumta se politikanët kanë tentuar të frikësojnë mediat.