Ish-gjyqtari i Gjykatës Kushtetuese, Kadri Kryeziu ka kritikuar kryeministrin e Kosovës, Albin Kurti dhe krerët e shtetit se nuk po bëjnë punë serioze në trajtimin e kërkesave nga ndërkombëtarët.

Në emisionin “FIVE”, Kryeziu ka thënë se Kurti duhet të kryejë detyrat e shtëpisë dhe obligimet pasi nëse nuk kryhen do ketë pasoja gjithëpërfshirëse.

Kërkesat nga ShBA-ja sipas tij duhet të përmbushen dhe të mos merren vetëm në këndvështrimin politik duke thënë se Kurti nuk është vetëm kryeministër i VV-së por i të gjithë qytetarëve.

“Kurti duhet të kryejë detyrat e shtëpisë, dhe nuk mundet pa i kry se pasojat janë të mëdha, gjithëpërfshirëse. Nuk duhet të bëjë hajgare me shtetin, nuk janë duke u bërë serioze nga shteti, nuk është vetëm kryeministër i VV-së, duhet të shihet nga këndi i shtetit e jo nga ana politike”, ka deklaruar Kryeziu.

Ai ka thënë se Kurt duhet ta dërgojë draftstatutin për Asociacionin në Kushtetuese dhe ta largojë nga vetja si barrë.

“Ta dërgojë në Kushtetuese dhe e largon nga vetja si barrë”, ka vijuar Kryeziu.