Kryetari i Londrës, Sadiq Khan e ka akuzuar presidentin e zgjedhur të SHBA-së, Donald Trump se e ka kritikuar vazhdimisht për shkak të përkatësisë së tij etnike dhe besimit mysliman, raporton Agence France-Presse (AFP).
Dyshja u përfshi në një luftë të jashtëzakonshme fjalësh gjatë presidencës së parë të Trump, fillimisht e nxitur nga Khan që kishte folur kundër ndalimit të udhëtimit në SHBA për njerëzit nga disa vende myslimane.
Trump më pas e akuzoi Khan se e kishte bërë një “punë shumë të keqe me terrorizmin”.
Komentet e tij të fundit për Trump janë në kontrast të plotë me ato të kolegëve të tij në Partinë Laburiste të Mbretërisë së Bashkuar, e cila erdhi në pushtet në korrik.
Kryeministri Keir Starmer e ka uruar menjëherë Trumpin për “fitoren historike të zgjedhjeve”.
Starmer tha se telefonata e tyre ishte “shumë pozitive, shumë konstruktive” dhe e ashtuquajtura marrëdhënie speciale midis MB dhe SHBA do të “prosperojë” në mandatin e dytë të Trump.
