Albert Krasniqi, nga KDI, ka komentuar interpretimin e fundit të Gjykatës Kushtetuese, e cila ka sqaruar se e drejta për të propozuar Kryetarin e Kuvendit i takon subjektit politik me numrin më të madh të deputetëve pas zgjedhjeve, raporton GazetaBlic.
Megjithatë, ai theksoi se Gjykata nuk ka përcaktuar nëse kjo e drejtë mbetet e vlefshme edhe kur subjekti nuk paraqet një kandidat. Krasniqi theksoi se bllokimi i institucioneve është i papranueshëm dhe që një e drejtë që nuk ushtrohet, humbet.
Ai kërkoi një interpretim të ri nga Gjykata Kushtetuese për situatat kur nuk propozohet kandidat brenda një afati të arsyeshëm, duke sugjeruar që e drejta për të propozuar Kryetarin mund t’i kalojë një subjekti tjetër politik.
Postimi i plotë:
Gjykata Kushtetuese ka interpretuar se e drejta për të propozuar Kryetarin e Kuvendit i takon subjektit politik me numrin më të madh të deputetëve pas zgjedhjeve. Megjithatë, ajo nuk ka përcaktuar nëse kjo e drejtë mbetet e vlefshme edhe në rast se subjekti nuk paraqet një kandidat.
Kujtojmë se në vitin 2014, PDK kishte propozuar Agim Aliun si kandidat për Kryetar të Kuvendit. Bllokimi i institucioneve nuk është i lejuar nga Kushtetuta, ashtu siç nuk ishte lejuar monopoli në rastin e propozimit të mandatarit për Kryeministër.
Një e drejtë që nuk ushtrohet, humbet. Prandaj, një interpretim nga Gjykata Kushtetuese për situatën kur nuk propozohet kandidat brenda një afati të arsyeshëm, nuk duhet të përjashtojë mundësinë që kjo e drejtë t’i kalojë një subjekti tjetër politik që ka numrat për të zgjedhur Kryetarin e Kuvendit.
