KQZ ka konfirmuar se sonte nuk do të ketë konferencë për media lidhur me rezultatet preliminare.

Këtë e konfirmoi vetë Komisioni Qëndror përmes një komunikate dërguar mediave, përcjell GazetaBlic.

Më poshtë edhe komunikata e plotë.

Të nderuar përfaqësues të mediave;

Duke iu falënderuar shumë për angazhimin tuaj gjatë ditës së sotme duke raportuar për procesin zgjedhor dhe punën e KQZ-së, dua t’iu njoftoj se sonte nuk do të ketë një konferencë nga anëtarët e KQZ-së lidhur me rezultatet preliminare.

Rezultatet preliminare janë duke u shfaqur në aplikacionin e KQZ-së dhe ftojmë mediat që t’i referohen ashtu siç po bëjnë deri më tani. Në këtë aplikacion janë duke u shfaqur rezultatet preliminare të Zgjedhjeve për Kryetar Komune dhe rezultati i subjekteve politike për Kuvende Komunale.

Gjithashtu, dua të njoftoj qytetarët e Republikës së Kosovës, se këto janë vetëm rezultate preliminare. Rezultatet përfundimtare shpallen nga KQZ pas verifikimit dhe numërimit të votave me kusht; votave me postë; votave të personave me nevoja të veçanta; pas përfundimit të të gjitha procedurave në Qendrën e Numërimit dhe Rezultateve; si dhe pas përfundimit të shqyrtimit dhe vendosjes lidhur me ankesat eventuale të subjekteve politike dhe kandidatëve të tyre.

/GazetaBlic/