Drejtuesit e PSG-së po konsiderojnë një largim nga Parc des Princes pasi një marrëveshje me qytetin për blerjen e stadiumit dështoi. PSG-ja kërkonte të investonte gati 500 milionë euro në stadium për ta modernizuar, por para kësaj kërkonte të bëhej pronar i tij. Por kryebashkiaku Anne Hidalgo hodhi poshtë me vendosmëri mundësinë e shitjes, prandaj, siç shkruan ESPN, klubi po i drejtohet një zgjidhjeje të re.
Bëhet fjalë për ndërtimin e një stadiumi të ri në një vend tjetër, i cili do të linte bosh Parkun e Princave. Ai stadium u ndërtua në vitin 1972, dhe PSG u vendos në të në 1974, katër vjet pas themelimit të klubit, dhe ka luajtur atje për gati 50 vjet. Klubi deri më tani ka investuar rreth 80 milionë euro në stadium, por nuk dëshiron të bëjë investim kapital nëse nuk është pronar i stadiumit, përcjell GazetaBlic Sport.
“Ne jemi shumë të zhgënjyer nga qëndrimi i qytetit të Parisit, i cili në këtë mënyrë do të dëbojë klubin dhe tifozët e tij nga shtëpia e tyre dhe plotësisht nga ajo pjesë e qytetit. Përveç kësaj, stadiumi në gjendjen e tij aktuale do të vazhdojë t’u kushtojë taksapaguesve dhjetëra milionë euro në vit dhe do të qëndrojë bosh sepse nuk do të ketë kush të luajë me të.
Ne kemi negociuar për një kohë shumë të gjatë me qytetin për blerjen e stadiumit, por kryetari i komunës përfundoi papritur negociatat dhe braktisi idenë. Ne nuk e donim këtë, por duhet t’i drejtohemi opsioneve të reja”, tha një zëdhënës i PSG për ESPN.
Nuk ka ende detaje për ndërtimin e mundshëm të një stadiumi të ri dhe as nuk ka nisur ndonjë projekt, por PSG nuk do ta kishte problem të financonte ndërtimin e stadiumit të tij nëse do të kishte vërtet nevojë. Nëse klubi largohet nga Parc de Princes, ai stadium nuk do të kishte më një qiramarrës të përhershëm.
/GazetaBlic Sport
