Franca mund të dërgojë së shpejti trajnerë ushtarakë në Ukrainë, pavarësisht shqetësimeve të disa aleatëve dhe kritikave nga Rusia, dhe mund të shpallë vendimin e saj javën e ardhshme gjatë një vizite të presidentit ukrainas.

Kështu thanë burime diplomatike për Reuters.

Diplomatët thanë se Parisi shpresonte të krijonte dhe të drejtonte një koalicion vendesh që ofrojnë një ndihmë të tillë për përpjekjet e luftës së Kievit, edhe pse disa nga partnerët e tij të Bashkimit Evropian kanë frikë se mund të bëjë më të mundshëm një konflikt të drejtpërdrejtë me Rusinë.

Franca fillimisht do të dërgonte një numër të kufizuar personeli për të vlerësuar modalitetet e një misioni përpara se të dërgonte disa qindra trajnerë, thanë dy nga diplomatët.

Trajnimi do të përqendrohej rreth çminimit, mbajtjes së pajisjeve operacionale dhe ekspertizës teknike për avionët luftarakë që do të sigurohen nga Perëndimi, thanë ata. Parisi gjithashtu do të financonte, armatoste dhe stërvitte një briga të motorizuar ukrainase

“Aranzhimet janë shumë të avancuara dhe ne mund të presim diçka javën e ardhshme”, tha një nga burimet.

Presidenti ukrainas Volodymyr Zelenskiy do të shkojë në Francë më 6 qershor, në 80-vjetorin e Ditës D, kur ushtarët aleatë zbarkuan në Normandi për të dëbuar forcat gjermane naziste gjatë Luftës së Dytë Botërore. Ai do të zhvillojë bisedime me presidentin francez Emmanuel Macron në Paris ditën e nesërme.

Komandanti i lartë i Ukrainës tha të hënën se ai kishte nënshkruar dokumentet që lejonin instruktorët ushtarakë francezë të vizitojnë qendrat e trajnimit ukrainas së shpejti.

Ministria e Mbrojtjes e Ukrainës, në një “sqarim”, tha se Kievi kishte shprehur interes për një projekt që përfshin pranimin e instruktorëve të huaj që nga shkurti.

Presidenti rus Vladimir Putin e portretizoi praninë e ushtrisë së rregullt franceze në Ukrainë si një hap drejt konfliktit global.