Qeveria izraelite nuk e ka konfirmuar pretendimin specifik se sulmuesit e Hamasit prenë kokat e foshnjave gjatë sulmit të tyre shokues të shtunën, tha një zyrtar izraelit për CNN, duke kundërshtuar një deklaratë të mëparshme publike.
“Ka pasur raste të militantëve të Hamasit që kryejnë prerje kokash dhe mizori të tjera të stilit të ISIS. Megjithatë, ne nuk mund të konfirmojmë nëse viktimat ishin burra apo gra, ushtarë apo civilë, të rritur apo fëmijë”, tha zyrtari.
Pretendimet e tmerrshme se fëmijëve u ishin prerë kokat në kibuc të Kfar Aza u shfaqën të martën në mediat izraelite. Forcat e Mbrojtjes së Izraelit (IDF) më vonë e përshkruan skenën si një “masakër” në një deklaratë për CNN.
Gratë, fëmijët e vegjël dhe të moshuarit u “mbytën brutalisht në një mënyrë veprimi të ISIS”, tha IDF, raporton CNN.
Tal Heinrich, një zëdhënëse e kryeministrit Benjamin Netanyahu, tha të mërkurën se foshnjat dhe fëmijët e vegjël ishin gjetur me “kokat e tyre të prera” në Kfar Aza. Një zëdhënës i IDF-së më vonë gjatë ditës tha gjithashtu se terroristët kishin prerë kokat e fëmijëve.
“Ne e dimë se kishte foshnja të vdekura. Ka prova se ka pasur prerje kokash. Nuk e di se si t’i verifikoj numrat apo se si u vranë”, tha zëdhënësi i IDF, Majori Nir Dinar.
