Izraeli po përballet aktualisht me një konflikt në të paktën katër fronte, duke luftuar në Gaza kundër Hamasit, në Liban kundër Hezbollahut, në Jemen kundër Houthëve dhe përballë kërcënimeve nga Irani, që mbështet këto grupe.
Pavarësisht përshkallëzimit të tensioneve në të gjithë rajonin e Lindjes së Mesme, çmimet e naftës nuk kanë reaguar aq ashpër sa pritej, duke u treguar më të qëndrueshme.
Pas sulmit të Hamasit ndaj Izraelit në 7 tetor 2023, çmimet e naftës u rritën, siç ndodh shpesh në kohë krize. Brent, një nga standardet kryesore të naftës së papërpunuar, arriti në 90 dollarë për fuçi në prill 2023, pas tensioneve midis Iranit dhe Izraelit. Megjithatë, në javët e fundit, edhe pse konflikti është intensifikuar, çmimet kanë mbetur relativisht të ulëta, duke qëndruar në rreth 77 dollarë për fuçi, një rritje e vogël nga 71 dollarë në fillim të javës.
Analistët e tregut kanë theksuar disa faktorë që po ndihmojnë në mbajtjen e çmimeve të stabilizuara. Në njërën anë, ekziston frika e një përshkallëzimi të mëtejshëm që mund të përfshijë infrastrukturën e naftës së Iranit, i cili është një furnizues i rëndësishëm rajonal. Megjithatë, kapaciteti i Iranit për të ndikuar ndjeshëm në tregjet globale është i kufizuar për shkak të sanksioneve të vazhdueshme nga SHBA-ja. Për më tepër, tregjet po vëzhgojnë me kujdes mundësinë që karteli i vendeve prodhuese të naftës, OPEC, të rrisë prodhimin në dhjetor, gjë që do të sillte një furnizim të shtuar dhe do të ndihmonte në uljen e presionit mbi çmimet.
Ndërkohë, situata ekonomike globale mbetet e brishtë. Ekonomia globale po përballet me pasojat e pandemisë COVID-19, inflacionit dhe rritjes së normave të interesit, çka ka ulur kërkesën për naftë. Kina, një nga konsumatorët më të mëdhenj të energjisë, ka parë një ngadalësim të ekonomisë për shkak të krizës së tregut të pasurive të paluajtshme, gjë që ka ulur kërkesën për naftë.
Kombinimi i këtyre faktorëve – frika nga konflikti, pritshmëritë për rritjen e furnizimit nga OPEC dhe perspektiva e zymtë ekonomike globale – ka bërë që çmimet e naftës të qëndrojnë më të qëndrueshme sesa pritej, pavarësisht tensioneve të mëdha politike dhe ushtarake në Lindjen e Mesme.
/Euronews Albania/
