Forcat izraelite kanë bastisur një prej tre spitaleve të mëdha në pjesën veriore të Gazës, të quajtur Kamal Adwan, duke urdhëruar dhjetra pacientë dhe qindra persona të tjerë të evakuohen, ndërkohë që një pjesë e objektit është përfshirë nga zjarri.

Këtë e bëri të ditur Ministria e Shëndetësisë e Palestinës, raporton Reuters.

Diku tjetër në Gaza, sulmet izraelite vranë të paktën 25 njerëz, përfshirë 15 njerëz në një shtëpi të vetme në qytetin e Gazës, thanë mjekët dhe shërbimi i urgjencës civile.

Po ashtu, Ministria e Shëndetësisë ka njoftuar se ka humbur kontaktet me stafin që ndodhej brenda spitalit në Beit Lahiya, që ka qenë nën presion të vazhdueshëm nga forcat izraelite për javë të tëra.

Ushtria izraelite tha se ishte përpjekur të kufizonte dëmtimin e civilëve dhe kishte “lehtësuar evakuimin e sigurt të civilëve, pacientëve dhe personelit mjekësor përpara operacionit”, por nuk dha detaje.

Në një deklaratë, ajo tha se luftëtarët nga grupi palestinez Hamas, i cili më parë kontrollonte Rripin e Gazës, kishin operuar nga spitali gjatë gjithë luftës dhe e kishin bërë vendin një bastion kyç. Hamasi e hodhi poshtë deklaratën si “gënjeshtër”, duke thënë se nuk kishte luftëtarë në spital.

Youssef Abu El-Rish, zëvendësministri i shëndetësisë i emëruar nga Hamasi, tha se forcat izraelite i kishin vënë zjarrin departamentit të kirurgjisë, laboratorit dhe një depoje.

Ushtria izraelite tha se kishte një zjarr të vogël në një ndërtesë të zbrazët brenda spitalit që tha se ishte nën kontroll.

“Lidhur me pretendimet se zjarri u shkaktua nga të shtënat me armë të IDF-së, IDF-ja aktualisht nuk është në dijeni të ndonjë incidenti të tillë”, tha ajo.

Ashtu si spitalet indoneziane dhe Al-Awda, Kamal Adwan është sulmuar në mënyrë të përsëritur nga forcat izraelite që kanë sulmuar skajin verior të Rripit të Gazës për javë të tëra, thotë stafi mjekësor palestinez.