Aventura e drejtorit sportiv Igli Tare te Lazio ka marrë fund. Vetë menaxheri e ka bërë të ditur për ‘TG1’: “Pas 18 vitesh eksperienca ime e mrekullueshme si drejtor sportiv i Lazio-s do të marrë fund. Kam kohë që e kam marrë këtë vendim, por prita të mirën e Lazios për të arritur objektivin me pjesëmarrjen në Champions League.

Ka qenë një aventurë e gjatë dhe intensive e përbërë nga gëzime, disfata dhe trofe. Nuk do të ndalem së falënderuari Presidentin Lotito për mundësinë që më ka dhënë, tifozët bardhekaltër që më kanë hyrë në zemrën time, klubin me të gjithë anëtarët e tij, lojtarët, stafin dhe të gjithë ata që më kanë qenë pranë në këtë rrugëtim.

Një falënderim i veçantë veçanërisht për familjen time që më ka qëndruar gjithmonë pranë. Një mundësi prestigjioze që pata si futbollist dhe si menaxher dhe që nuk do ta harroj kurrë, duke marrë me vete çdo moment të këtij rrugëtimi. Me shpresën që secili prej jush të vazhdojë, me të njëjtin pasion që kisha unë, ta ruaj me xhelozi këtë realitet të bukur. Gjithmonë forca Lazio”.