Kryetari i Bashkimit të Sindikatave të Pavarura të Kosovës, Atdhe Hykolli, në një prononcim për GazetaBlic, flet rreth ikjes së zyrtarëve shtetërorë nga puna dhe të qytetarëve në përgjithësi.
Ai tregon sesi është gjendja e ikjes së zyrtarëve dhe qytetarëve nga puna në Kosovë, si dhe thotë se sektori publik i Kosovës po përjeton sfida, duke çuar në një largim të dukshëm të zyrtarëve.
“Sektori publik në Kosovë po përjeton sfida të mëdha, duke çuar në një largim të dukshëm të zyrtarëve. Faktorë të ndryshëm kanë kontribuar por edhe janë duke kontribuar në këtë trend, duke përfshirë pakënaqësinë me pagat, paqëndrueshmërinë politike dhe zbatimin jo të duhur të reformave të administratës publike. Qeveria ka tentuar të adresojë disa çështje duke futur një ligj të ri për pagat dhe duke vendosur një koeficient pagash e që në shumë sektorë ka sjellë deri të pakënaqësitë e arsyeshme. Përkundër këtyre përpjekjeve, punëtorët e sektorit publik janë përfshirë në greva dhe kanë shprehur pakënaqësi me kompensimin e tyre, duke treguar se masat e marra deri më tani nuk i kanë zgjidhur plotësisht problemet themelore”, deklaroi ai.
“Reforma e administratës publike në Kosovë ka qenë një luftë e gjatë, me ndërhyrjet politike, nepotizmin dhe mungesën e llogaridhënies që pengojnë progresin edhe përkundër udhëzimeve të vendeve mike. Zbatimi i ligjeve të reja është përballur me pengesa të shumta, po edhe po përballet, duke përfshirë jostabilitetin politik dhe sfidat gjyqësore, duke e bërë të vështirë krijimin e një administrate publike efektive dhe funksionale e cila është më se e nevojshme për zhvillimin dhe qëndrueshmërinë e vendit tonë. Përveç kësaj, kushtet ekonomike të Kosovës, duke përfshirë papunësinë e lartë dhe inflacionin, kanë shtyrë shumë individë të mirë arsimuar të emigrojnë në kërkim të mundësive më të mira. Ky largim i profesionistëve të ditur ka përkeqësuar dhe është duke e përkeqësuar më tej sfidat me të cilat po përballet sektori publik në vendin tonë”, vazhdoi tutje ai.
Tutje, Hykolli thotë se në largimin e zyrtarëve dhe qytetarëve nga Kosova po kontribuojnë disa faktorë. Këto sipas tij përfshijnë sfidat ekonomike, paqëndrueshmërinë politike, pakënaqësinë me kushtet e sektorit publik dhe çështjet sociale.
“Ikja e zyrtarëve dhe qytetarëve nga Kosova mund t’i atribuohet disa faktorëve të ndërlidhur si Faktorët Ekonomikë: Papunësia e lartë dhe pagat e ulëta: Kosova ka një nga normat më të larta të papunësisë në Ballkanin Perëndimor, me një shkallë të papunësisë te të rinjtë që ishte 49.1% në vitin 2020, edhe pse ajo ra në 38% në 2021. Shkalla e përgjithshme e papunësisë ishte 20.4 % në 2021, kështu e thonë statistikat të cilave duhet besuar. Pagat e ulëta në sektorin publik, përkundër reformave të fundit, gjithashtu kanë kontribuar në pakënaqësinë e zyrtarëve publikë dhe kjo pakënaqësi po rritet ditë më ditë. Paqëndrueshmëria ekonomike: Ekonomia e Kosovës, edhe pse po rimëkëmbet, është ende e rënduar nga inflacioni i lartë dhe sfidat strukturore. Shumë qytetarë largohen në kërkim të mundësive më të mira ekonomike jashtë vendit, po edhe për shkak të mundësive joshëse për të qëndruar në vendin tonë. Faktorët Politikë: Paqëndrueshmëria politike me një peizazhi politik shumë shpesh të paqëndrueshëm, me ndryshime të shpeshta në qeveri dhe ndërhyrje të vazhdueshme politike në administratën publike. Kjo paqëndrueshmëri minon besimin në institucionet publike dhe vështirëson planifikimin afatgjatë duke mos i lënë rrugëdalje tjetër profesionistëve, zyrtarëve e qytetarëve, por vetëm ikjen nga vendi”, tha ai.
Më tej ai thotë se perspektiva e standardeve më të mira të jetesës, mundësive arsimore dhe rritjes profesionale si në vendet e jashtme, po ashtu sipas tij edhe në vendet nordike dhe të Beneluksit janë mjaft tërheqëse për zyrtarët dhe qytetarët tanë.
“Korrupsioni dhe nepotizmi i përhapur dhe i rrënjosur në administratën publike kanë gërryer dhe po e gërryen besimin e publikut duke e penguar qeverisjen efektive. Këto çështje kanë kontribuar dhe janë duke kontribuar në mungesën e mundësive për avancim në karrierë për profesionistët kompetentë, duke i shtyrë ata të kërkojnë mundësi diku tjetër dhe duke ikur nga vendi. Shqetësimet mjedisore: Çështje të tilla si ndotja e ajrit, menaxhimi i dobët i mbetjeve dhe rregulloret jo të duhura mjedisore ndikojnë në cilësinë e jetës, duke e bërë vendin më pak tërheqës për banorët por edhe për investitorët potencialë. Arsimi dhe mundësitë profesionale: Ende ka mundësi të kufizuara arsimore dhe profesionale pavarësisht se kemi një popullsi të re dhe të arsimuar, Kosova ende vazhdon të ofrojë mundësi të kufizuara për rritje dhe zhvillim profesional, duke çuar shumë individë të aftë të emigrojnë. Faktorët e tërheqjes së jashtme: Vendet e BE-së po edhe vendet e tjera ofrojnë mundësi tërheqëse jashtë vendit, prandaj shumë kosovarë kanë të afërm në diasporë të cilët ofrojnë mbështetje financiare dhe lehtësojnë migrimin e tyre. Perspektiva e standardeve më të mira të jetesës, mundësive arsimore dhe rritjes profesionale në vende si Gjermania, Zvicra, Anglia, po edhe në vendet nordike dhe të Beneluksit janë mjaft tërheqëse për zyrtarët dhe qytetarët tanë”, përfundoi kryetari i Bashkimit të Sindikatave të Pavarura të Kosovës, Atdhe Hykolli.
/GazetaBlic/
