Ish-deputeti i VV’së, Fatmir Humolli i quan si gabim bisedimet me Serbinë për çështjen e dinarit.

Humolli në një prononcim për GazetaBlic thekson se, a tërhiqet Qeveria nga ky vendim apo jo, ka pak rëndësi, por sipas tij, bisedimet për problemet e brendshme janë gabime fillestare.

“Bisedimet për problemet e brendshme të Kosovës me Serbinë, janë gabimi fillestar. A tërhiqet apo qëndron, për mua ka pak rëndësi”, tha Humolli.
“Qeveria e Kosovës e ka obligim kushtetues, t’i zbatoj ligjet pa e pyetur Serbinë sepse po të ishte pyetur Serbia, ne nuk do të ishim çliruar asnjëherë”, shton ai për GazetaBlic.

Ndryshe, i dërguari i posaçëm i Bashkimit Evropian për dialogun Kosovë – Serbi, Miroslav Lajçak ka thënë se kryenegociatori i Kosovës, Besnik Bislimi dhe ai i Serbisë, Petar Petkoviq do të jenë në Bruksel këtë javë. Lajçak ka thënë se të enjten shpreson se do të jenë në gjendje të kapërcejnë mosmarrëveshjet e mbetura.

Lajçak ka shkruar në “Facebook” se të hënën e kaluar ka pritur në Bruksel kryenegociatorët e Kosovës dhe Serbisë, zëvendëskryeministrin Bislimi dhe drejtorin Petkoviq.

“Vazhduam diskutimet tona për gjetjen e një zgjidhjeje të zbatueshme për njerëzit e prekur nga vendimi i Bankës Qendrore të Kosovës. Në përgjithësi, ka qenë një takim i dobishëm. Të dyja palët patën mundësinë të shpjegojnë idetë dhe qëndrimet e tyre. Në fund erdhëm në përfundim se do të nevojitet një takim tjetër. Të dy palët do të jenë në Bruksel këtë javë dhe shpresoj se do të jemi në gjendje të kapërcejmë mosmarrëveshjet e mbetura të enjten”, ka shkruar ai.

Beqa: PDK-ja do t’i fitojë zgjedhjet, qytetarët nuk mashtrohen më nga VV’ja

Pantina thotë se Qeveria ka dështuar: Pse duhet votuesit t’i japin edhe një shansë Albin Kurtit?