Humbja në derbi djeg gjithmonë dhe tifozët e Lazios nuk e kanë kapërdirë ende disfatën ndaj Romës fundjavën e kaluar, teksa gjithë mllefin ndaj futbollistëve bardhekaltër e kanë shfaqur nga tribuna gjatë ndeshjes me Salernitanën.

Kështu tifozeria “Curva Nord” e bardhekaltërve ka shpalosur një banderolë, ku shkruante: Nuk jeni të denjë për të veshur fanellën tonë. Një referencë e qartë për futbollistët e Lazios, të cilët u mposhtën me rezultatin minimal 1-0 në derbin ndaj Romës.

Natyrisht kjo humbje nuk mund të përjetohet si dramë, aq më tepër që Lazio nuk pësonte disfatë në derbi prej dy vitesh, megjithatë tifozët kanë kontestuar edhe presidentin Lotito, me disa kore gjatë ndeshjes.