Kryetari i AAK-së, Ramush Haradinaj, ka pritur sot në zyrat e partisë Përfaqësuesin e Posaçëm të Norvegjisë për Ballkanin Perëndimor, Eirik Nestås Mathisen, i shoqëruar nga zyrtarë norvegjezë dhe ish-ministri i Mbrojtjes, Armend Mehaj, raporton GazetaBlic.

Në takim u diskutua për zhvillimet në Kosovë dhe rajon, integrimin euroatlantik si dhe nevojën për thellimin e bashkëpunimit ndërmjet Kosovës dhe Norvegjisë.

Haradinaj shprehu mirënjohje për mbështetjen e vazhdueshme norvegjeze ndaj paqes dhe stabilitetit në Ballkan.

Postimi i plotë:

Sot pata kënaqësinë të mirëpres në zyrat e Aleancës Përfaqësuesin e Posaçëm të Norvegjisë për Ballkanin Perëndimor, z. Eirik Nestås Mathisen, i shoqëruar nga z. Fredrik Onstad, këshilltar në Ministrinë e Punëve të Jashtme të Norvegjisë, dhe z. Armend Mehaj, ish-ministër i Mbrojtjes në Kosovë.

Diskutuam për zhvillimet aktuale në Kosovë dhe rajon, për perspektivën euroatlantike, si dhe për nevojën e thellimit të bashkëpunimit ndërmjet Kosovës dhe Norvegjisë.

Norvegjia ka qenë historikisht një mbështetëse e fuqishme e paqes dhe stabilitetit në Ballkanin Perëndimor dhe një partnere e rëndësishme për Kosovën në shumë fusha.

Mirënjohës për angazhimin e z. Mathisen dhe për përkushtimin e shtetit norvegjez ndaj Kosovës.