Tomë Gashi- avokati i familjes Dehari, ka akuzuar Prokurorinë Speciale se e njëjta po hesht duke mos iu përgjigjur kërkesave të familjes Dehari lidhur me zhdukjen e mostrave në Institutin e Mjekësisë Ligjore.

Me anë të një postimi në Facebook, avokati Gashi ka njoftuar se i është drejtuar me letër prokurorit të rastit, Afrim Shefkiu, pas raportimit se janë gjetur mostrat e Deharit në IML.

“Rasti i mostrave te Astrit Dehari-t. Kërkesa e radhës dërguar Prokurorit të Prokurorisë Speciale z. Afrim Shefkiu. Edhe pse kanë kaluar 1 vit e 4 muaj nga publikimi i zhdukjes se mostrave të Astrit Deharit. Edhe pse Prokurori ka pranuar shumë kërkesa për ta njoftuar familjen e Astritit për këtë çështje. Edhe pse Prokurori e ka obligim ta bëjë këtë. Prokurori vetëm hesht, asnjëherë nuk përgjigjet..!”, thotë Gashi.

Sipas tij, Prokuroria po e përdor heshtjen për të arsyetuar “neglizhencën totale” të zbulimit të vrasësve të Astrit Deharit.

“Plagët e Astritit janë dëshmi e vrasjes se tij që nuk mund t’i fsheh askush siç nuk ka mundur t’i fshehë edhe një ish-kryeprokuror i cili deshti rastin e vrasjes se Astritit ta mbyll për 13 ditë në kundërshtim me provat që e vërtetojnë se Astrit ështe vrarë”, shkruan avokati Gashi.