Futbolli anglez ka vendosur të heqë dorë nga minuta e heshtjes përpara ndeshjeve në rastet e fatkeqësive globale, pasi një studim i fundit ka treguar se ky gjest simbolik po humb ndikimin dhe domethënien që kishte dikur.

Sipas “The Times”, minuta e heshtjes do të mbahet vetëm për ngjarje ndërkombëtare që lidhen drejtpërdrejt me botën e futbollit, ndërsa rastet e tjera nuk do të përfshihen më në këtë praktikë.

Në vitet e fundit, klubet angleze kanë nderuar viktimat e tërmetit në Marok dhe të përmbytjeve shkatërruese në Libi, duke mbajtur momente heshtjeje në të gjitha stadiumet.

Megjithatë, muajin e kaluar vetëm disa skuadra — Manchester United, Manchester City, Bolton dhe Salford City — mbajtën minuta heshtjeje për viktimat e sulmit me thikë në një sinagogë në Manchester, duke shënuar kështu ndryshimin e qasjes në futbollin anglez ndaj homazheve të këtij lloji.

Ky vendim synon të ruajë seriozitetin dhe qëllimin e vërtetë të gjestit simbolik, duke e kufizuar vetëm në ngjarje me lidhje të drejtpërdrejtë me komunitetin e futbollit.