Refik Halili mbetet pronar i 66% të aksioneve të KF Tirana, të paktën deri në një vendim të dytë. Gjykata e Juridiksionit të Përgjithshëm të Shkallës së Parë, Tiranës ka vendosur të pezullojë veprimet përmbarimore për shitjen e 66% të aksioneve të klubit duke pranuar kërkesën e Halili SHPK, që i ishte drejtuar me një padi ku kërkonte pikërisht pezullimin e ekzekutimit të vendimit në favor të familjes Preza për shkak të shkeljeve proceduriale.

Kërkesë që është pranuar nga Gjykata çka do të thotë se në këtë mënyrë ndërpritet ankandi i nisur para pak ditësh ku kishin dalë në shitje 66% të aksioneve me një vlerë fillestare prej rreth 161 milionë lekësh. Në fazën e parë të ankandit e cila përfundoi të hënën e kaluar nuk pati asnjë ofertues , dhe pas tij nisën procedurat për një ankand të dytë, por që tani ndërpritet me vendim të Gjykatës e cila ka vendosur rikthimin e gjykimit të çështjes së kësaj mase përmbaruese në themel.

Është pa dyshim një betejë e rëndësishme e fituar nga Presidenti aktual i Tiranës Refik Halili, që edhe pse do të duhet të vazhdojë betejën ligjore në lidhje me mënyrën e dëmshpërblimit ndaj familjes Preza në një çështje që tanimë ka marrë formë të prerë, eviton rrezikun e kalimit të aksioneve që disponon në klubin Tirana në duar të tjera.

Veç të tjerash, në skuadër tani mund të fokusohen më të qetë te finalja e sezonit që vendos gjithçka për sa i përket mundësisë së Tiranës për të siguruar një vend në Europë dhe gjithashtu dhe për titullin kampion, pa shqetësimin e një çështjeje të rëndësisë maksimale për sa i përket menaxhimit administrativ të klubit./ss