Emri i ish-lojtarit të kombëtares franceze, Franck Ribery, është shfaqur në dokumente të deklasifikuara në skandalin Epstein.

Futbollisti përmendet gjashtë herë në një deklaratë të palës së tretë të lidhur me abuzimin seksual dhe një rrjet prostitucioni, por nuk janë ngritur akuza kundër tij. Avokati i tij i ka mohuar fuqimisht akuzat, duke i quajtur ato “lajme të rreme”.

Është e rëndësishme të sqarohet se deri më sot nuk ka asnjë procedurë ligjore të njohur kundër ish-lojtarit të Bayern Munich dhe Olympique Marseille bazuar në këto akuza. Vetëm përmendja e emrit të dikujt në dosjet Epstein nuk nënkupton në vetvete shkelje nga ana e tyre, thekson gjithashtu RMC Sport.

Reagimi nga përfaqësuesit e futbollistit nuk vonoi shumë. Avokati i tij, Brusa Carlo Alberto, komentoi ashpër:
“Ky është një lajm i rremë! Nesër do të ndërhyj në cilësinë time si avokat i z. Ribery dhe do të ndërmarr të gjitha veprimet e nevojshme ligjore për të sanksionuar ata që janë përgjegjës për këtë lajm të rremë që dëmton dinjitetin e klientit tim dhe familjes së tij.”

Jeffrey Epstein, një figurë e shquar në jetën e lartë të Nju Jorkut në vitet 1990 dhe 2000, u akuzua për shfrytëzim seksual të mbi një mijë vajzave të reja, përfshirë të mitura. Ai u gjet i varur në qelinë e tij në Nju Jork në vitin 2019, para fillimit të gjyqit të tij për krime seksuale.

/GazetaBlic Sport/