Trajneri i Kosovës, Franco Foda, është lajmëruar pas shortit në Kupën e Botës, ku Kosova mori vesh kundërshtarët e grupit nëse arrin të kualifikohet për këtë kampionat.

“Australia, Paraguai, ShBA, kanë një grup shumë të mirë këtu. Por ne fillimisht duhet të kualifikohemi”, ka thënë Foda në faqen zyrtare të Federatës së Futbollit të Kosovës.

“Na kanë mbetur edhe dy ndeshje të rëndësishme si mysafir…ndaj Sllovakisë…e më pas kundër Turqisë ose Rumanisë”.

Ai tha se në ShBA për short mbretëroi atmosferë e mrekullueshme

“Nëse do të kualifikoheshim, do të kishim një grup të balancuar ku gjithçka është e mundur, por siç e përmenda, gjëja më e rëndësishme është që të kualifikohemi për Botëror”.