Gjyqtarja kosovare, Florentina Kallaba ka arritur suksesin më të madh në karrierën e saj, pasi është përzgjedhur në mesin e tetë gjyqtareve ndërkombëtare të UEFA-s që do të ndajnë drejtësinë në Kampionatin Botëror të vajzave në futsall, i cili do të mbahet në Filipine.
Ajo njëherësh shënon suksesin më të madh deri më tash të gjyqtarëve kosovar, pasi iu besua ndarja e drejtësisë në kompeticionin më të madh botëror në futsall.
Përzgjedhja e saj është rezultat i profesionalizmit, përvojës dhe përkushtimit që ajo ka treguar ndër vite në ndeshjet e kampionatit vendor, por edhe në ato ndërkombëtare, shkruan FFK, përcjell GazetaBlic Sport.
Florentina Kallaba njihet për autoritetin në fushën e lojës, për korrektësi në drejtësi dhe qetësi, vlera këto që e kanë bërë një prej gjyqtareve më të respektuara në Evropë.
/GazetaBlic Sport
