Trajneri i Barcelonës, Hansi Flick, ka bërë thirrje për përqendrim dhe angazhim maksimal nga skuadra e tij kundër Real Madrid të dielën.
Ai ka folur në prag të përballjes më të madhe të sezonit në La Liga.
Pas eliminimit në gjysmëfinale të Champions League nga Inter, Flick ka kërkuar reagim në “El Clasico”, që mund të jetë vendimtar në garën për titull.
“Folëm me lojtarët për atë që po ndiejnë. Është e rëndësishme që brenda grupit të shprehemi dhe ta kuptojmë njëri-tjetrin. Tani duhet të fokusohemi plotësisht te kjo ndeshje”, është shprehur trajneri gjerman në konferencën për shtyp të së shtunës.
Barcelona aktualisht kryeson kampionatin spanjoll me katër pikë më shumë se Real Madrid, me vetëm katër javë të mbetura deri në fundin e sezonit. Një fitore në këtë ndeshje do t’i afronte ndjeshëm katalanasit te titulli kampion.
Në përballjet e këtij sezoni, Barça ka qenë superiore ndaj “Los Blancos”, duke i mposhtur tri herë: 4-0 në La Liga, 5-2 në finalen e Superkupës dhe 3-2 pas vazhdimeve në finalen dramatike të Copa del Rey.
Por për Flick, pavarësisht statistikave, motivimi mbetet i pandryshuar. “Ne gjithmonë hyjmë në fushë për të fituar. Nuk na intereson renditja. Do të japim gjithçka për tre pikët. Kjo ndeshje ka rëndësi të veçantë për tifozët tanë, për klubin dhe për secilin prej nesh”, ka thënë ai.
Me atmosferën e “El Clasico” që pritet të jetë elektrizuese, Flick e ka bërë të qartë se Barcelona duhet të tregojë karakter, intensitet dhe dominim përballë një skuadre të fortë si Real Madrid.
