Të pasurit flokë të bukura dhë të shëndosha është një nga dëshirat kryesore të çdo vajze.

Derisa mund të harxhohen shuma të mëdha të hollash në produkte të ndryshme për mirëmbajtjen e flokëve, do të ishte më mirë t’i kushtojmë më shumë vëmendje disa gjërave të thjeshta që janë pjesë e rutinës ditore, por që i shkaktojnë dëme të mëdha flokëve.

Fjetja me flokë të kapura është një nga këto gjëra të dëmshme, për të cilën ekzistojnë disa shpjegime.

Mbajtja e flokëve të lidhura shkakton presion në rrënjët e tyre, dhe kjo mund të bëhet edhe më e rrezikshme nëse vendosni të flini me flokë të kapura.

Sipas hulumtimeve të Akademisë Amerikane të Dermatologjisë, fjetja me flokë të lidhura e shkakton rënien dhe këputjen e qimeve.

Kjo ndodhë ngaqë kapëset e flokëve krijojnë fërkim gjatë kohës sa jeni në gjumë, dhe bëni lëvizje të vazhdueshme.

Një problem tjetër që mund ta shkaktojë fjetja me flokë të lidhura, është gjendja shëndetësore e njohur si ‘alopecia’.

Alopecia shkakton humbjen e qimeve në kokë ose pjesë tjera të trupit.

Tërheqja e vazhdueshme e flokut mund ta shkaktoj këtë gjendje, ngase dëmton gjëndrat e flokëve.

Prandaj, ekspertët ju sugjerojnë që të flini me flokë të lëshuara ose të lidhura lirshëm në gërshet.