Partia e kryeministrit nacionalist Albin Kurti fitoi votat në zgjedhjet e së dielës, duke hapur rrugën për krijimin e një qeverie të re pas një bllokade politike njëvjeçare që ka paralizuar parlamentin dhe ka vonuar financimet kryesore ndërkombëtare, ka shkruar Reuters për fitoren e Vetëvendosjes.
Për të dytën herë këtë vit pati zgjedhje në Kosovë pasi partia Vetëvendosje e Kurtit nuk arriti shumicën në shkurt.
Muaj të tërë bisedimesh të dështuara për koalicion e shtynë Presidenten Vjosa Osmani të shpërndajë parlamentin në nëntor dhe të shpallë zgjedhje të parakohshme.
Analistët thonë se është e vështirë të parashikohet nëse Kurti do të jetë në gjendje të formojë qeverinë vetë pa një koalicion për të siguruar 61 vendet në kuvendin me 120 vende, vazhdon Reuters, transmeton Gazeta Express.
“Rezultatet nuk janë përfundimtare dhe nuk e shoh se si Kurti do ta formojë qeverinë vetëm, por do të jetë shumë e lehtë për të që të qeverisë me një koalicion të vogël”, tha Ismet Kryeziu nga grupi i ekspertëve Instituti Demokratik i Kosovës.
Kryeziu tha se Kurtit i duhen pak vota nga partitë shqiptare ose të pakicave për të formuar kabinetin e ri.
Reuters shkroi edhe për rezultatin e partive kryesore të opozitës, Partisë Demokratike dhe Lidhjes Demokratike.
Një tjetër dështim për të formuar një qeveri dhe për të rihapur parlamentin do ta zgjaste krizën në një kohë kritike. Ligjvënësit duhet të zgjedhin një president të ri në prill dhe të ratifikojnë 1 miliard euro (1.2 miliardë dollarë) në marrëveshje kredie nga Bashkimi Europian dhe Banka Botërore që skadojnë në muajt e ardhshëm.
Partitë opozitare kanë refuzuar të qeverisin me Kurtin, duke kritikuar mënyrën se si ai i trajtoi lidhjet me aleatët perëndimorë dhe qasjen e tij ndaj veriut të ndarë etnikisht të Kosovës, ku jeton një pakicë serbe. Kurti fajëson opozitën për bllokimin.
Në një përpjekje për të tërhequr votuesit, Kurti është zotuar për një muaj shtesë page në vit për punonjësit e sektorit publik, 1 miliard euro në vit në investime kapitale dhe një njësi të re prokurorie për të luftuar krimin e organizuar. Partitë opozitare janë përqendruar gjithashtu në përmirësimin e standardeve të jetesës – një shqetësim kryesor për votuesit, shkroi Reuters.
