Kryeministri i Kosovës, Albin Kurti, ka njoftuar se ka nënshkruar sot një vendim të rëndësishëm që lidhet me Ushtrinë e Kosovës, pikërisht kur sot shënohet Dita e Forcës në vendin tonë.

Ai bëri të ditur se do të themelohet një komision ndërministror për qëllim të vlerësimit dhe nisjes së procedurave dhe negociatave lidhur me hapjen e fabrikës për prodhimin e municionit dhe laborator mbi dizajnimin e fluturakeve pa pilot në Republikën e Kosovës.

“Një ushtri që për një kohë kaq të shkurtër është armatosur kaq shumë sa kjo e jona, ka nevojë për ta siguruar edhe garantuar operacionalitetin e plotë dhe qëndrueshmërinë në tërësi. Andaj me sot hedhim hapat tonë të parë për ngritjen e industrisë ushtarake”, tha kryeministri.

Më tutje, shefi i qeverisë në fjalën e tij në mbledhjen e sotme me ministra, tha se prioritet i tij ka qenë gjithmonë mbrojtja dhe kjo siç tha ai, është dëshmuar në vazhdimësi.

“Si me numrin e ushtarëve që është dyfishuar, si me buxhetin për Ministrinë  e Mbrojtjes që është trefishuar, si me trajnimet jashtë vendit që janë katërfishuar, si me investimet në armatim që janë shumëfishuar”, tha Kurti.