Filmi i tretë i Spider-Man luajtur nga Tom Holland ka rezultuar një sukses me kritikët pasi ata e kanë cilësuar si ‘veprën më të mirë deri më tani’ pas premierës së filmit në Los Anxhelos të hënën mbrëma.

“Spider-Man: No Way Home” deri më tani ka marrë një vlerësim të rrallë 100% në Rotten Tomatoes, i cili është një uebsajt i grumbullimit të vlerësimeve për filmin dhe televizionin, duke dhënë një pasqyrë të pritjes së kritikëve dhe fansave.

Vala e parë e vlerësimeve të kritikëve ka sugjeruar që fansat e Marvel-it janë të lumtur, pasi Holland rikthehet si heroi së bashku me zonjushën e tij Zendaya dhe një mori ish-antagonistësh të filmit.

Kritiku i “Deadline” Pete Hammond e përshëndeti filmin si “Spider-Man më emocionues dhe befasues nga të gjithë”, pasi ai parashikon se do të mahnitë fansat dhe gjithashtu do të kthejë të ardhura në kinematë e kufizuara nga Covid.

“Ky film bën atë që bëjnë gjithmonë filmat më të mirë: ata të emocionojnë dhe të befasojnë dhe të bëjnë të duash të brohorasësh në një kinema të mbushur me njerëz. Në dritën e pandemisë, ky film është një dhuratë festash jo vetëm për shikuesit e filmit, por edhe për ekspozuesit, sepse nëse ndonjëherë do të kishte një film të gatshëm për të shpëtuar biznesin e filmit – ashtu si Spider-Man gjithmonë e shpëton ditën – është ky i fundit i krijuar në mënyrë të shkëlqyer”, shkroi Hammond.