Në një sallë glamuroze të Hotelit Fairmont në Doha, përpara 800 të ftuarve të FIFA-s, të përbërë kryesisht nga drejtues të federatave dhe legjenda të futbollit, fituesit e çmimeve prestigjioze The Best për vitin 2025 do të shpallen sot nga ora 20:00.

Ousmane Dembele dhe Luis Enrique duken të sigurt se do të fitojnë përkatësisht çmimet e lojtarit dhe trajnerit më të mirë për meshkuj. Në kategorinë e femrave, Aitana Bonmati mund ta ngrejë çmimin “The Best” për herë të tretë, vetëm disa muaj pasi fitoi “Topin e Artë”. Megjithatë, lojtarja e Barcelonës nuk do të marrë pjesë në ceremoninë në Katar pasi po shërohet nga një lëndim i kohëve të fundit.

Çmimet e vitit 2025 do të përcaktohen në mënyrën më demokratike të mundshme: 25% e votave janë nga trajnerët e ekipeve kombëtare, 25% nga kapitenët, 25% nga gazetarët dhe 25% nga tifozët nëpërmjet faqes së internetit të FIFA-s.

/GazetaBlic Sport