Fabio Paratici dhe Milani po i afrohen gjithnjë e më shumë një marrëveshjeje përfundimtare.
Kontakti mes palëve vazhdon, me CEO-n e kuqezinjve, Giorgio Furlani, që tashmë ka vendosur të nisë një cikël të ri me ish-drejtorin sportiv të Juventusit dhe Tottenhamit.
Profili i 52-vjeçarit, i cili aktualisht është i pezulluar deri më 20 korrik, është ai që pëlqehet më shumë për të forcuar departamentin sportiv të klubit.
Kjo ka bërë që kandidatura e Igli Tares, i cili deri disa javë më parë ishte i preferuari i Ibrahimovic-it, dhe ajo e Tony D’Amicos të humbasin terren.
Paratici, ish-mesfushor, e nisi karrierën si drejtues te Sampdoria me Beppe Marotta-n, i cili më pas e mori me vete tek Juventusi.
Pas largimit të Marotta-s në 2018, ai u bë fillimisht drejtor sportiv dhe më pas Chief Football Officer i “Zonjës së Vjetër”.
Në tetor 2020 u emërua Drejtor Menaxhues i Departamentit të Futbollit te Juventusi, por në maj 2021 u largua pas përfundimit të kontratës së tij.
Pas një periudhe si drejtor i përgjithshëm te Tottenham-it, Paratici u pezullua për 30 muaj nga Federata Italiane e Futbollit për përfshirjen e tij në skandalin e plusvalencave tek Juventusi.
Tani, pas ndarjes me ‘Spurs’ në prill 2023, ai është gati të rikthehet në Itali. Pritet vetëm njoftimi zyrtar.
