Federata Angleze e Futbollit (FA) ka ndërmarrë veprime disiplinore ndaj Chelseat pas një incidenti të ndodhur në përfundim të ndeshjes kundër Aston Villas në dhjetor, e zhvilluar në “Stamford Bridge”.

Ngjarja ka të bëjë me hedhjen e një shisheje plastike me ujë drejt stolit të Aston Villas, pas fitores 2-1 të mysafirëve, të siguruar me dy gola të vonë nga Ollie Watkins. Festimet e Villas krijuan tensione pranë zonës teknike.

Sipas FA-së, Chelsea nuk ka garantuar sjellje të përshtatshme të lojtarëve dhe stafit të pranishëm pranë zonës teknike pas fishkëllimës finale, çka ka çuar në nisjen e procedurave disiplinore.

Në atë moment, mbeti e paqartë nëse shishja u hodh nga tribunat apo nga zona teknike, por ajo spërkati anëtarë të stafit të Aston Villas me një lëng që dyshohet të ketë qenë ujë. Një pjesëtar i stafit të Villas u pa duke reaguar drejt stolit të Chelseat.

Chelsea ka nisur një hetim të brendshëm për incidentin dhe pritet të reagojë zyrtarisht pas komunikimit të FA-së.