Presidenti turk, Recep Tayyip Erdogan, tha të mërkurën se Irani po mbron veten kundër sulmeve të paligjshme dhe “të çmendura” të Izraelit dhe asaj që ai e quajti “terrorizëm shtetëror”, dhe shtoi se vetëmbrojtja e Iranit ishte e natyrshme, ligjore dhe legjitime.

Ai tha gjithashtu se kryeministri izraelit, Benjamin Netanyahu, e kishte tejkaluar Adolf Hitlerin në kryerjen e krimeve të gjenocidit në Gaza.

“Kryeministri izraelit Netanyahu e ka lënë pas Hitlerin prej kohësh për sa i përket gjenocidit”, tha ai.

Duke folur para anëtarëve të Partisë së tij në pushtet, AK, në parlament, Erdogan tha gjithashtu se Izraeli e kishte sulmuar fqinjin e Turqisë, Iranin, pa pritur përfundimin e bisedimeve bërthamore midis Uashingtonit dhe Teheranit, duke shtuar se Ankaraja donte të shihte çështjet të zgjidhura përmes diplomacisë.

Ai tha se Turqia ishte gati të kontribuonte në një zgjidhje.