Burim Ejupi, drejtor në Institutin për Politika Zhvillimore (INDEP), është i ftuari i kësaj jave tek ‘Blic Interview’ nga Astrit Gashi.
Problemi i rritjes së tarifave të energjisë elektrike është një problem që ka shqetësuar qytetarët në ditët e fundit dhe duket se do të kthehet në realitet.
KEDS-i ka kërkuar rritje të rrymës pë 30 për qind dhe kjo gjë do të hyjë në fuqi më 1 prill të këtij viti.
Ejupi tha se kjo gjë po ndodh për shkak të kërkesës së madhe dhe shpenzimit të energjisë elektrike nga qytetarët e Kosovës, kurse ka përmendur faktin se subvencionim i klimave ka qenë hap pozitiv kursimin e energjisë, por mënyra se si është bërë ka qenë e gabueshme.
Ai tha poashtu se ky subvencionim është bërë nga paratë e Bashkimi Evropian dhe jo nga buxheti i qeverisë së Kosovës.
“Nëse nuk do të subvencionoheshin klimat, do të kishim fatura dhe shpenzime edhe më të mëdha të energjisë elektrike në vendin tonë. Mënyra se si janë subvencionuar klimat ka qenë e gabueshme, sepse duhej që subvencionimi të bëhej për ata që shpenzojnë energji elektrike më shumë. Ky subvencionim është bërë nga paratë e Bashkimi Evropian, qeveria duhet të ndërhyjë me paratë e saj dhe t’i subvencionojë bizneset dhe mënyrat që ndikojnë tek zvogëlimi i kërkesës direkte për energji elektrike”, tha fillimisht ai.
Ejupi përmendi edhe faktin se konsumi më i madh i energjisë elektrike bëhet në ndërtesa kolektive.
“Konsumi më i madh i energjisë elektrike bëhet në ndërtesa kolektive dhe jo në shtëpia private. Për shembull, e kemi Fushë Kosovën që ka një numër të madh ndërtesash, pastaj Ferizaj dhe çdo qytet tjetër në Kosovë, kjo ndikon shumë pastaj edhe në kërkesën për energji elektrike nga qytetarët, e cila rezulton edhe me import nga jashtë”, përfundoi Ejupi.
/GazetaBlic/
