Fitoret e fundit të Kombëtares Shqiptare në kuadër të eliminatoreve Euro 2024, nuk janë rastësore por rezultat i punës.

Kështu shprehet Presidenti i FSHF, Armand Duka i ftuar në studion e emisionit Opinion në TV Klan, i cili theksoi se futbollistët dhe i gjithë stafi kanë kualitet.

“Nuk janë rastësi as paraqitjet, as rezultatet, janë fryt i punës dhe përkushtimit. Mund të kesh dhe përkushtim, por s’ke kualitet. Edhe kualiteti i futbollistëve, stafit, opinionit të krijuar dhe padyshim që i prisja. Objektivi i vetëm është kualifikimi. Të tilla grupe të japin më shumë shanse sepse të gjitha ekipet mund t’i marrin pikë njëri-tjetrit”.

Sa i përket ndeshjet me Poloninë që Shqipëria e fitoi 2:0, Duka vlerësoi se polakët nuk e kërcënuan asnjëherë portën shqiptare.

“Padyshim që është kundërshtar shumë i mirë me kualitet në fushë. Ajo që kisha më shumë frikë ishin këta të dy, Zelinski dhe Lewandowski. Faktikisht jo vetëm që nuk na ndëshkuan, por as na rrezikuan, ekipi ishte i vendosur mirë në fushë”.

Sipas kreut të FSHF, ekipi shqiptar është i kompletuar në të gjitha aspektet.

“Shqipëria ka në fushë, në stol dhe të paseleksionuar që kanë pothuajse të njëjtin kualitet dhe kjo është një anë tjetër e fortë që çon drejt rezultatit”, theksoi i pari i futbollit shqiptar.