Futbollisti Youcef Atal u pezullua nga Nice pasi shpërndau një video në mediat sociale të predikuesit palestinez Mahmoud al-Hasanat duke i kërkuar Zotit t’u dërgojë “një ditë të zezë hebrenjve” dhe t’i jap një ndihmë banorëve të Gazës.

“Drejtuesit u takuan dhe folën me Youcef Atal. Klubi e kupton se lojtari e njohu gabimin duke e fshirë me shpejtësi publikimin dhe duke kërkuar falje publike. Megjithatë, duke pasur parasysh natyrën e publikimit të përbashkët dhe seriozitetin e tij, Nice mori vendimin për të zbatuar menjëherë sanksionet e para disiplinore ndaj lojtarit, përpara atyre që mund të vendoseshin nga autoritetet sportive dhe gjyqësore. Si i tillë, klubi ka vendosur të pezullojë Youcef Atal deri në një njoftim të dytë”, thuhet në një komunikatë, përcjell GazetaBlic Sport.

Duhet të theksohet se për lojtarin është duke u zhvilluar një hetim nga Prokuroria Publike e Nicës. Mbrojtësi i djathtë 27-vjeçar algjerian po akuzohet për “mbështetje të terrorizmit” dhe “nxitje të urrejtjes”.