Jurgen Klopp u prezantua zyrtarisht në pozicionin e tij të ri në Red Bull këtë të martë dhe iu përgjigj disa pyetjeve, njëra prej të cilave kishte në qendër mundësinë që Liverpool të fitojë një ose më shumë tituj të Premierligës, nëse Manchester City dënohet për shkeljet financiare.

Gjithmonë me natyrë pozitive, 57-vjeçari gjerman komentoi: “A duhet të them diçka? E bëra këtë diskutim kur u largova. Nëse ndodh, i thashë të gjithëve të bëjnë çfarë të duan, do të rezervojmë fluturimin dhe unë do të blej birrat.”

Manchester City përballet me 130 akuza nga Premier League për fshehjen e informacionit përkatës financiar mes viteve 2009 dhe 2018. Çështja tashmë ka kaluar në gjykatë dhe vendimi pritet të bëhet i ditur në muajt e ardhshëm, në pranverë.

Në fushë, Liverpooli i Klopp ishte dy herë në vendin e dytë në kampionat, një pikë prapa Manchester Cityt (në 2018/19 dhe 2021/22), dhe në varësi të dënimit të aplikuar për qytetarët, trofet mund të shkojnë pikërisht në duart e ‘The Reds’.

/GazetaBlic Sport/