Dega e 4-të e Lidhjes Demokratike të Kosovës, në Prishtinë, mbajti sot tubim në sheshin “Adem Jashari”, ku të pranishëm ishin kryetari i LDK-së, Lumir Abdixhiku dhe kandidati për kryetar të kryeqytetit, Përparim Rama.
Me këtë rast, në fjalën e tij, Rama, ndër të tjera tha si në vijim:
“Rastisi që sot të jetë dita botërore e urbanizmit. Unë ende dua me qenë arkitekt e urbanist. Por, i nji niveli tjetër, shumë më të gjerë. Dua të jem faktor kyç për transformimin e qytetit tonë. Përvojat e shumta ndërkombëtare që i kam akumulu e më kanë formësu në karrierën time 20-vjeçare, du me i pru këtu, në vendlindjen time, në qytetin tim më të dashur në këtë rruzull, e me ia shëru qytetit tonë plagët urbane duke e kthy në një qytet model, prej të cilit do të marrin shembull jo veç kryeqytetet e rajonit, por edhe qytete të tjera e shumë më të mëdha.”
Ndërsa, kryetari Abdixhiku, para të pranishmëve tha se vizioni i Përparim Ramës për Prishtinën është i qartë dhe i drejtë, dhe shtoi se Përparimi me programin e tij për të gjithë do ta transformon kryeqytetin.
Te strukturat dhe anëtarët e degës së 4-të, në Prishtinë vërehej një entuziazëm i lartë dhe një mobilizim i jashtëzakonshëm për festën e 14 nëntorit, të cilët shprehnin bindjen e plotë se Përparim Rama do të jetë kryetar i Prishtinës.
