Kevin De Bruyne ka falënderuar tifozët e Manchester City për mbështetjen e tyre. Mesfushori luajti ndeshjen e tij të fundit në stadiumin Etihad si lojtar i City – kur skuadra mposhti Bournemouth 3-1 në javën e 37-të të Premier League.

Pas ndeshjes, Manchester City njoftoi se një statujë në nder të De Bruyne do të ngrihej pranë stadiumit.

“Tifozët kanë qenë jashtëzakonisht mikpritës që nga fillimi. Fakti që pothuajse një stadium i mbushur erdhi për të më përshëndetur mua dhe familjen time flet vetë. Kush mund t’i bëjë 50,000 njerëz të thonë lamtumirë në atë mënyrë? Është e pamundur të përshkruhet – jam shumë mirënjohës.”

Për statujën pranë Etihad: “Do të thotë që gjithmonë do të jem pjesë e këtij klubi. Gjithmonë do të jem pjesë e tij, dhe sa herë që të kthehem këtu me fëmijët, me familjen ose miqtë e mi, do të jem në gjendje ta shoh veten në këtë stadium. Gjithmonë do të jem këtu.

“E di që ky vit ka qenë mjaft i vështirë për ne, por besoj se ekipi meriton gjithë mbështetjen tuaj. E di sa shumë po punojnë lojtarët dhe ky ekip do të kthehet vitin tjetër për të luftuar për çdo titull – ata e meritojnë këtë.

“Pas 10 vitesh, mendoj se më në fund është koha që të më lejojnë të flas pak – dhe është koha të them lamtumirë”, tha De Bruyne.

/GazetaBlic Sport