Bordi i KRU “Mitrovica” i emëruar në korrik 2021 nga Qeveria Kurti ka zgjedhur kundërligjshëm kryeshefin ekzekutiv të kësaj ndërmarrje.
Inspektorati i Punës ka konstatuar se ka pasur shkelje të shumta në përzgjedhjen e Bashkim Kurtit në pozitën e kryeshefit të Ujësjellësit të Mitrovicës.
Fillimisht përmes procedurave dhe më pas për faktin që Kurti nuk i ka plotësuar kushtet e konkursit që të hyjë as në listën e ngushtë të kandidatëve.
Në dokumentin e siguruar nga Veriu.info nga burimet brenda kompanisë konstatohet në detaje shkeljet që janë bërë në këtë proces si dhe vendimi i Inspektoratit për anulim të zgjedhjes së kryeshefit.
Kompania Rajonale e Ujësjellësit “Mitrovica” kishte shpallur konkurs për kryeshef ekzekutiv më 12 gusht të vitit 2021, ku Bordi i Përkohshëm kishte përzgjedhur në këtë pozitë kandidatin Bashkim Kurti.
Ndaj këtij vendimi është bërë ankesë në Inpektoratin e Punës nga kandidatët tjerë, Alajdin Avdullahi, Naim Hajdini dhe Demir Shala.
Inspktorati i Punës pas shqyrtimit të ankesave ka pranuar si të bazuar ankesën e kandidatit Alajdin Avdullahi për mos përzgjedhjen e tij në pozitën e kryeshefit.
Avdullahi ankesën e tij e ka dorëzuar në Inspektorat më 25 tetor 2021, pas vendimit të Bordit të Përkohshëm të Drejtorëve të datës 12 tetor 2021 për përzgjedhjen e kandidatit Bashkim Kurti në pozitën e kryeshefit të KRU “Mitrovica”.
Portali ka siguruar vendimin e Inspektoratit të Punës përmes të cilit konstatohet se Bordi i Përkohshëm i Drejtorëve ka bërë shkelje në procedurat e përzgjedhjes së kandidatit Bashkim Kurti në pozitën e kryeshefit.
Sipas këtij raporti zyrtar të Inspektoratit të Punës Bordi i Përkohshëm i Drejtorëve së pari është dashur të mbajë test me shkrim për kandidatët që i kanë plotësuar kriteret e konkursit dhe më pastaj të vazhdohet me intervistën me gojë, andaj Bordi ka vepruar në kundërshtim me dispozitën e nenit 10 të Udhëzimit Administrativ Nr. 07/2017.
Pas procedurave me shkrim dhe intervistës me gojë Bordi ka qenë i obliguar që të gjithë kandidatëve t’ua dërgojë vendimin përfundimtar të përzgjedhjes së kandidatit që ka më së shumti pikë nga test me shkrim dhe intervista më gojë.
Po ashtu Inspketorati i Punës ka konstatuar se Bordi i Përkohshëm ka bërë shkelje duke përzgjedhur kandidatin Bashkim Kurti në pozitën e kryeshefit pasi ky i fundit nuk i ka plotësuar kriteret e konkursit, ku kriter ka qenë që të ketë diplomë universitare në lëmin e administrimit të biznesit, ekonomisë, financave, inxhinierisë, apo nga fushëveprimtaria e ndërmarrjes, andaj kandidati i përzgjedhur Bashkim Kurti ka diplomuar në kolegjin AAB Drejtimi Kriminalistikë dhe Master i Arteve në Menaxhment dhe Informatikë.
Bazuar në këto Inspektorati i Punës më datë 26.11.2021 i ka bërë vërejtje Bordit të Përkohshëm të Drejtorëve të KRU “Mitrovica” që në afat prej 3 ditësh të shfuqizojë vendimin për zgjedhjen e kryeshefit Bashkim Kurti dhe të rishqyrtohen edhe njëherë të gjitha procedurat që nga momenti i mbylljes së konkursit.
Kësisoj të mbahet testi me shkrim dhe intervista me gojë vetëm me kandidatët që i kanë plotësuar kushtet e konkursit.
Një vendim i tilë ende nuk është zbatuar dhe Bashkim Kurti vazhdon ta ushtrojë funksionin e kryeshefit ekzekutiv të KRU “Mitrovica”.
Më poshtë u sjellim raportin zyrtar të plotë të Inspektoratit të Punës:
