Derbi i madh mes Llapit dhe Ballkanit do të zhvillohet të shtunën në “Zahir Pajaziti” në kuadër të xhiros së parafundit të Superligës së Kosovës në futboll.

Me fitore Llapi e zhvendos çështjen e kampionit në xhiron e fundit, teksa në rast se ekipi nga Theranda triumfon ose barazon, atëherë do shpallen kampion për herë të tretë radhazi.

Ish futbollisti i njohur kosovar, Blendi Memaj thotë se kjo do jetë ndeshja më e zjarrtë e këtij sezoni në futbollin vendor.

“Padyshim që do të jetë ndeshja më e zjarrtë e sezonit, me dy skuadrat që do të jenë përballë një lufte direkte, e cila do të tregojë qartë se cila nga to meriton të dal kampion këtë stinor”, tha fillimisht Blendi Memaj për ‘GazetaBlic Sport’.

Ai thotë se kjo ndeshje do luhet në tri periudha të ndryshme.

“Nuk ka matematikë barazimi në kesi lloj ballafaqimi, do të luhet për fitore nga të dyja taboret, mirëpo përmes taktizimeve të ndryshme. Ajo çka ndoshta mund të parashikojmë është se loja do të ketë 3 periudha të ndryshme taktisueze, fillimi i saj që do të jetë me Llapin, i cili ndoshta do të tentojë që në minutat e parë të dëtyrojë kundërshtarin ta ndjej “Zahir Pajazitin” duke ushtruar presion lartë në bazë edhe të asaj që është deklaruar, ndersa Ballkani me kundërsulme eventuale përmes individëve shumë cilësor t’i kundërpergjigjet trysnisë vendase. Pastaj periudha e dytë do të jetë më e ekuilibruar, pasiqë varësisht nga rezultati deri në minutën e 70-të të dy skuadrat do t’i ruajnë energjitë për në fund, varësisht se si do të merr rrjedhojë ndeshja”, vazhdoi ai.

Në fund, Memaj tha se Llapi mund të jetë pak më favorit, shkaku i terrenit vendas, por edhe Ballkani ka ditur të fitojë në stadiume të tilla.

“Lufta është e hapur, nuk shoh favorit, ndoshta për një nuancë Llapin do ta favorizojë terreni dhe tifozët ”Legjendat”, mirëpo Ballkani ka ditur që në terrene të vështira të tregojë fytyrë kampioni, kështuqë mund të perfundojmë se do të jetë një ndeshje e cila do të mbahet mend gjatë, përshkak të rëndesisë së saj si dhe kualitetit të të dyja skuadrave”, përfundoi ai.

/GazetaBlic Sport