Presidenti amerikan Joe Biden parashikohet të fitojë me lehtësi zgjedhjet presidenciale demokrate në Michigan, pavarësisht nga një votë e konsiderueshme proteste për qëndrimin e tij ndaj luftës në Gaza.

Aktivistët kanë kaluar javët e fundit duke u kërkuar demokratëve të votojnë “të paangazhuar” dhe dhjetëra mijëra zgjodhën ta bëjnë këtë.

Kjo tejkaloi shumë pritshmëri, megjithëse projeksioni i fundit i CBS Neës sugjeron se zoti Biden fitoi 80% të votave në përgjithësi.

Ai falënderoi “çdo Michigander që bëri që zëri i tyre të dëgjohet sot”.

SHBA është një aleat i Izraelit, duke i ofruar atij miliarda dollarë ndihmë ushtarake. Në fillim të këtij muaji, SHBA-ja vuri veton ndaj një rezolute të OKB-së që bën thirrje për një armëpushim të menjëhershëm në Gaza, ndërsa propozoi një draft të vetin, duke kërkuar një armëpushim të përkohshëm.

Pozicioni i SHBA-së ka zemëruar shumë njerëz, duke përfshirë edhe vetë partinë e Bidenit, të cilët duan që presidenti të mbajë një qëndrim më të fortë kundër fushatës ushtarake të Izraelit, raporton BBC, transmeton Klankosova.tv.

Në një deklaratë që nuk i referohej votës së protestës kundër tij, ai përshëndeti arritjet e administratës së tij në shtet dhe nisi një sulm kundër rivalit të tij Donald Trump.